غربة و اضطرينا نعيشها ، اخترناها عمد او خارجة عن إرادتنا ، قابلنا فيها ناس جداد باوضاع وظروف وعادات جديدة و لغات مختلفة و ثقافات غير مألوفة بالنسبة النا بس هاد الشي مفروض علينا شئنا أم أبينا ، و لأن دوام الحال من المحال و لأن طبيعي كل فترة يتغير طريق الناس يلي حولينا ويتغير طريقنا فلازم ندور عاشخاص نكمل معها اكبر فترة من الطريق يلي بحققلنا حلمنا وما يضر حلمهم كمان
مين منا ما لقى شوية صعوبة بالوصول للرفقات يلي بناسبو وبيفهمو عليه وعلى تفكيرو وبكون في حلقة كبيرة من الاشيا المشتركة ؟؟ و مين ما تسبب بإحباط لأنه ما لقى مين يكون جنبه بأهم مواقف حياته؟؟ طيب قبل ما تلوم الناس يلي ما لقيتها جنبك و قبل ما تلوم المعارف يلي محسوبين بدائرة الأصدقاء فكرت شو هي نظرة هي العالم الك و شو مكانك عندهم؟؟
أنك تكسب شخص قريب الك معناه أنك تكون محل ثقة عنده و هالشي يلي صار مفقود بزماننا ، بس أول شي لازم تختار الناس يلي بترتاح معهم و الاشخاص يلي بيشبهوك ، بنفس الوقت الناس يلي ما حسيت أن فيه شي بشدك الهم لا تقطعهم مرة وحدة بالعكس خلي في وصل بيناتكم دايما و لو كانت العلاقة فيها بعض الرسمية لانو يوما ما هالناس ممكن تحتاجهم او تمشي معهم بجزء من طريق حياتك
هلأ بعد ما تختار الاشخاص المناسبة بتجي مرحلة كيف ممكن تخليهم يوثقوا فيك و يعطوك المكانة الصح الك وهون بيجي موضوع ( الصدق) يلي هو أهم نقطة حتى تكسب الثقة و يلي هو الاساس بموضوع الصداقة الحقيقية وبترتكز عليه باقي الشغلات من طريقة التعامل وحفظ السر وتقديم المساعدة قدر المستطاع والوفاء بالوعد والامانة ،يعني بدك تعامل الرفقة على اساس ان عنجد عندك القدرة للتضحية بكل شي عندك لو تطلب الموقف لهيك ، لازم تحسس شريكك او رفيقك أن مافي قوة بتقدر تمنع علاقتكم من الاستمرارية و تكون معه بوقت مصيبته و حزنه قبل الفرح ، وأهم من هيك اوعى أن تكون مصلحجي وقت يلي بدك منه شغلة تقرب منه و بعدها ما بقا تورجيه وشك…..
بس موضوع الثقة مو بس بيتضمن العلاقات القريبة منا ، لازم حتى هي الناس يلي تعرفنا عليهم بمحض الصدفة “برحلة – بعمل -مدرسة او جامعة او حتى دائرة حكومية ” يشوفوا فينا هالصفة ، ما بتخسر شي لو شفت شب بالطريق متلبك او بحاجة مساعدة أنك تقدم له ولو مجرد سؤال لمساعدته ، او لو شفت شي رجال كبير اد ابوك بدو يمشي معاملة بدائرة حكومية وماله عرفان من وين يبلش انك تمشي معه و تحاول تساعده ، هي الشغلات البسيطة يلي انت مالك حاطط الها قيمة ما بتتخيل اديش ممكن تعمل معك بالمستقبل ، لان ما بتعرف المستقبل شو مخبي لك ، ممكن ترجع تلتقى بهي الناس بالمواقف يلي بتكون فعلاً بحاجة مساعدة و تلاقيهم تلقائيا وقفوا جنبك بدون تردد ، هون بيجي أخونا السلبي و بقلي ما بقا في من هاد الحكي غير كلام نظري بس ….هون بجي بقلك ان لا تتصرف غير بأصلك ولا تنسى أن كما تدين تدان
ولو طرقنا تباعدت وتشتت بس اكيد الذكرى والصورة الحلوة يلي رسمناها بقلوب هي العالم حتبقى دايما و حنبقى محل ثقة عندهم مهما كانت الظروف ضدنا
واخر شي كل واحد منكم يذكرلنا موقف صار معه ترك بصمة ثقة عند العالم التانية….بانتظاركم
#خطوجية_مختلفة
#خطوجية_مبتكرة
