جميع المعلومات عن المنحة التركية

#منحة_تركيا
#سوريين
#جامعات
كتير مننا بيسئل على المنح المقدمة من الجامعات وكيفية التقديم عليها واليوم جبنالكون معنا المنحة من الجامعات التركية هي طريقة تسجيلا طويلة شوي وفي عدة اسئلة واستفسارات بس كلو بيهون في سبيل العلم بقا افتحو مخكون شوي واقرأو المطلوب بتمعن منشان ماحدا تروح عليه لانو ماعرف يسجل
التسجيل كالتالي:
١- بجب الانتباه والتأكد من صحة معلومات “انشاء الحساب او العضوية” قبل البدء في التسجيل لانها غير قابلة للتعديل .. مثل المواليد و الايميل و الاسم وغيرها.
٢- تطلب هيئة المنحة ان تكون الصورة الشخصية التي تحمل في الفورم ذات عمر لا يتجاوز ال٦ أشهر (يفضل مو اجباري )
٣- تعطي هيئة المنحة للطلاب الذين يدرسون البكالوريا حاليا مدة زمنية لاحضار شهادات البكالوريا تمتد حتى تاريخ ٣٠ تموز
٤- احتفظوا بالرقم المرجعي الذي يظهر لكم في الفورم فهو الرقم الخاص بكم في المنحة وسيتم استخدامه فيما بعد.
٥- جميع الحقول التي يشار اليها بنجمة فهي الزامية. اما ما عدا ذلك فهو غير الزامي.
٦- يمكن تحميل الوثائق في المنحة بعدة صيغ منها صيغة الصور المعروفة jpeg
٧- لما بيسألك عن “عدد الاخوة” لازم تحسب حالك .. يعني عدد الاولاد كلن معك انت
٨- لما بيسألك عن دخل العائلة الشهري .. لا تعمل حالك انت وعيلتك مفلسين . لان رح يسألوا حالن .. شلون عايشين لكن ؟؟ حط رقم يكون منطقي بحيث: كافي لادنى حد من المعيشة الك ولعيلتك بدون اي مبالغة
٩- مشان معلومات مكان الاقامة . مابيهم جنسيتك .. حط انت وين ساكن وبس . ( اذا كانت المنطقة مو معروفة مافي داعي تحطا )
١٠- الملاحظ هذه السنة ان اختيارات المقابلة لمن هم في تركيا ستكون في احدى مدينتين هما: انقرة ، عنتاب
المقابلات رح تكون مدتها شهر ونص من ١ ايار ولغاية ١٥ حزيران ( يعني اذا ما اجتك رسالة بالاول ما معناتو انو رفضوك .. بدك تصبر)
١١- بالنسبة لمعلومات الدراسة: يلاحظ اولا انه يم قبول الشهادات غير الثانوية العامة ( اي الثانوية الصناعية ، الشرعية )
بالنسبة للشهادة السورية:
جماعة العلمي بيختاروا: fen/doga bilimleri –
وجماعة الادبي بيختاروا: sozel
بالنسبة لموضوع اختيار المعدل: هاد الامر اسهل ما يكون .. عندك بالفورم عدة خيارات .. وعدة مجاميع .. المجموع اللي بتختاره .. بتختار علامتك على اساسه (يعني اذا اخترت نظام الدرجات من ٢٩٠ فلازم تحط علامتك من اصل ٢٩٠ … واذا اخترت من ٢٦٠ فلازم تحط علامتك من اصل ٢٦٠ .. وهكذا .. لا تشغلو حالكون بحساب معدل و حذف مواد ديانة وغيرو .. كيف بيكون مجموعك حطو … وبالنسبة للي مجموعهن بالالاف .. اول ٣ ارقام هنن المجموع .. والرقم الرابع هاد بعد الفاصلة .. مثلا حدا مجموعه ٢١٩٧ .. هاد بينكتب بالفورم على شكل: ٢١٩,٧ … واضح ؟؟؟ )
في شي بعدها اسمه امتحانات انهاء الثانوية بسوريا ماعنا هالشي ..اتركوها فاضية مابيأثر
١٢- الصفحة الي بعدها عم يسألك اذا الك ترتيب او غيرو على مستوى المدرسة او المدينة او او .. اذا الك حط . واذا ما الك ترتيب لا تحط
١٣- رح يطلب منك تحمل وثيقتين .. الاولى: شهادة الثانوية (يعني الكرتونة الخضرا )
الثانية: كشف العلامات (اللي هي الوثيقة الصفرا اللي فيها العلامات والمجموع)
اللي عندو الوثيقتين يحط كل وحدة بمكانها … اللي ما عندو يحط المصدقة اللي بين ايديه في المكانين .
ملاحظة أخرى: التعديل غير مطلوووووب والترجمة غير مطلوبة
١٤- الصفحة اللي بعدها عم يسألكن اذا عندكن امتحانات دولية ، جوائز ، منح ، ميداليات .. الخ الخ
اكيد ماعنا شي كلنا بس الي عندو يحط
١٥- الصفحة اللي بعدا عم يسألوكن مشان اللغات .. اللغة الام هي العربية .. غالبا
بعدين عم يسألوكن اذا بتعرف تركي . قلن اي او لأ .. اذا اي بتحط شهادة .. اذا ما عندك شهادة بتكتب مستواك بكل مهارة من المهارات الاربعة .
و بيسألوك اذا بدك تعمل فحص اعفاء (يعني بيجوز تعرف لغة وماعندك قدرة تاخد شهادة .. بدك فحص؟؟؟ ) اللي بدو يحط اي .. واللي مابدو يحط لأ حسب كل شخص .
نفس الشي بالنسبة للغات الاجنبية ..
١٦- الصفحة اللي بعدها :بتحكي عن الشغل .. هواياتك وتطوعاتك وتدريباتك .. كل حدا بيعبي حسب ما بيشوف في حالو
١٧- الصفحة الأهم هي هيه ولازم نختار
حران للهندسات و العلوم والاداب ..
ابن سينا للطب ..
يونس ايمره للغة التركية
الالهيات للشريعة
ماتبقى مالنا فيون
ملاحظة مهمة: اللي بيخربط باختيار نوع الشهادة /بالفقرة رقم ١١/ .. مارح تطلعله كافة الفروع الموجودة .. اللي بدو يطلعلو كل شي موجود .. يختار متل ما قلتلو فوق .. انتبهوا على هالنقطة
١٨- بالنسبة لصفحة الرغبات:
الملاحظة الاولى: اقل شي للبكالوريوس ٦ رغبات – للماجستير ٣ رغبات
الملاحظة التانية: اذا اخترت ال١٢رغبة كلن .. لازم ثم لازم ثم لازم يكون على الأكثر ٦ منن محصور في: اسطنبول – انقرة – ازمير .. وال٦ الباقين بيكونوا بغير مدن .. لكن ما بيصير تختاروا اكتر من ٦ فيهن
الملاحظة الثالثة: مافي مشكلة اذا حطيت الخيارات ال١٢ نفس الرغبة .. وربما يكون افضل كمان
الملاحظة الرابعة: كلما بتختاروا فرع رح يطلعلكن سطر شروط .. مافي شي .. هاد الشرط اللي بالفقرة /٣/ تبع اخر موعد للشهادة
الملاحظة الخامسة: ما شفت انا ولا رغبة محطوط جنبها انكليزي ..هاد مابيعني انو مافي انجليزي .. اختاروا الجامعة والمدينة بما يناسب كل شخص فيكون
الملاحظة السادسة: اللي محتار وما عرفان اش يساوي . يختار رغبة واحدة وينتقل للصفحات الي بعدها وبالاخير يرجع للرغبات
١٩- بالنسبة لصفحة رسائل النية: عبارة عن ٣ اسئلة نصيحتي اكتب رأيك انت لأنو افترض انسئلت هالأسئلة بمقابلة شخصية لازم تكون جاهز ولا تقلي مابعرف اكتب كلنا منكتب وممكن انسئل عنها بالمقابلة لهيك لازم كون مقتنع فيها
٢٠- موضوع رسائل التوصية للبكالوريوس والماجستير: عندك حطا .. ما عندك لا تحطا ..
بتمنى تكونو استفدتو منها ومنعتذر عالاطالة
www.Turkiyeburslari.gov.tr
وموفقين جميعا