#خطوة_للتغير #مقالات #خطوة #هيك_سمعت
هيك سمعت
الكلمة يلي حتدخل كتاب غينيس ع اد ما عم تتكرر كل يوم بحياتنا اليومية و نبني على اساسها ردود فعل و مواقف و قرارت لدرجة أنها صارت ذات مصداقية عند ناس كتير و خصوصي لو كان هالشي متماشي مع مصلحتهم الشخصية
(هيك سمعت ) اشاعة وصلت بطريق صدفة او طريق عمد لسمعنا و صدقناها و مشينا بالقصة و ربي ييسر من دون ما نتأكد لو كانت فعلا صحيحة او لا؟؟ المضحك بالموضوع أن البهارات يلي عم تنحط عالاشاعة لما بتنتقل من شخص لشخص ذو فعالية عالية جدا لدرجة أن الشخص الاول يلي طلع فيها مستغرب كيف تطورت بهي السرعة و صارت موضوع تاني تماما ما الها صلة بالموضوع الاساسي . هلأ كلمة ( الإشاعة) جاية من فعل (شاع) ويلي معناه انتشر … و على اد ما بتنتشر المعلومة يلي جاية من مصدر مو معروف اصله من وين على اد ما بتتصدق من قبل الناس ، يعني مو بالضرورة يكون النشر اله هدف او غاية …لا ببساطة هي غالبا بتكون اشاعة للتحريض او للمسخرة او لطنق الحنك و الشلي عالناس …
أما بالنسبة للشروط يلي بتخلينا ننشد للإشاعة أنها تكون مهمة بالنسبة النا او لناس منعرفها حتى ننقلهم ياها و أنها تكون بتحتوي شوية غموض حتى نشغل خيالنا الواسع بتتمة للموضوع و إضافة منكهات تعطيها شكل جديد كل ما تنتقل من شخص للتاني وبهالحالة منكون قضينا بنجاح ساحق على عامل الملل يلي ممكن يرافق متل هيك قصص
أنواع الإشاعات كتيرة بتتماشى مع الوضع و الزمن و المكان يلي بتتواجد فيه ، مثل الاشاعة يلي طلعت من فترة بسعودية وكان الها هدف (مادي ) وهو أن نوع من ماكينات الخياطة فيها مادة الزئبق الأحمر حتى نتفاجئ بعد فترة ان صار سعر الماكينة قريب نص مليون ريال!!!وبعضها هدفها سياسي حتى تخلق نوع من الفتنة و الحرب او متل ما منقول كبريتة لتشعل القلوب و تخلي الناس تعلق مع بعضها ، والهدف الاكتر انتشار هو اللعب و التسلاية و تضييع الوقت متل وفاة فنان معين او فنانة خلعت عينها و رسام انتحر من عالسجادة ….
يلي بخوف بالموضوع هو الآثر النفسي يلي بتتركه الإشاعة بنفوس الناس و مافي اكتر من اخبار ناس نجلطت او صار معها ارتفاع ضغط و ارتفاع سكر من ورا إشاعات سمعتها وانصدمت فيها ، او طلاب تحطمت بسبب اشاعة عن انخفاض معدلات النجاح او ارتفاع مفاضلة الجامعات ، و أمهات قلقت على ولادها بسبب إشاعة عن وباء ماله موجود أساسا متل انفلونزا القطط أو حمى النمل ……
منوصل لجوهر الموضوع ويلي هو ما تصدق كل يلي بتسمعه و مو كل واحد حلف ستين يمين معظم معناها صادق لأن للأسف في ناس كتيرة مو فارقة معها على شو ما حلفت لو كان صدق ولا كذب ومو مهم عندها شو ممكن هالإشاعة تعمل بالشخص يلي عم توصله ، بنفس الوقت لو وصلت لعندك شي كذبة او اشاعة خليها توقف عندك ولا تكون أداة تحريض او زرع فتنة او إثارة تنتين رفقات على بعض ، لو مالك متأكد من شخص لا تعطي سمعك و لو وصلك شي ماله مصدر اكيد لا تساهم بنشره …. خليك مكان ثقة عند الناس يلي بتعرفك لآن ولو ما كان الك هدف سيء من ورا توصيلك خبر غلط في ناس شغلتها و عملتها تسويد صفحتك وتشويه سمعتك ، خليك صادق مع حالك و خود خطوة للتغير ……..
#خطوجي
