نصيحة للسنافر (الطلاب المستجدين)

رجعت الجامعات من جديد و هي عم تستنى جيل جديد من السنافر ( نظرا لصغر الحجم و المواقف المضحكة ) المستجدين يلي مو عاطين فرحتهم لحدا و تعبى الفيسبوك منشورات منهم أن صاروا طلاب جامعة ……والله هي الصراحة معهم حق حتى ما نكون ظالمينهم لأن بكونوا قضوا سنة بكالوريا فوق الخيال من كتر الشد و الضغط بس المساكين مفكرين أن الجامعة هي البريك الطويل يلي مافيها لا تعب ولا دراسة ولا جهد
هلأ المهم ما بدنا ننرع عليكم فرحتكم و خليكم مبسوطين و مكيفين عالآخر لأن كل مرحلة من العمر والها ميزاتها و سلبياتها و يمكن الفرحة يلي أنتو فيها هلآ ما بقا تحسوا فيها مرة تانية لان بكون وقتها خلص
وبعد أسبوع دوام بالجامعات و السنافر ضايعين مو عرفانين وين المدرج من المقصف من المكتبة من الحرم الجامعي و عايشين حالة تشتت تام و صياع مطلق مابين الأسئلة الشائعة المتكررة كل يوم أكتر من عدد الطلاب نفسهم أن من وين ندرس من الكتب ولا المحاضرات؟؟ نكتب ورا الدكتور ولا نسجل عالموبايل؟؟ نوقف للدكتور أول ما يفوت ولا لأ؟؟ اسمه دكتور ولا أستاذ؟؟ أيه ساعة بتبدا الفرصة؟؟……..و أسئلة كتيييييرة منها المضحك ومنها المضحك و منها المضحك ، هلأ هون بكونوا طلاب السنين التانية نازلين هاد الاسبوع بس مشان التأفيل عالسنافر و أعطائهم النصايح الملخبطة يلي بتفوت بالحيط زيادة أن ع اساس عندهم خبرة و كذا من هالسلبات ……
و بآخر يوم من هالأسبوع تكونت فكرة عند الطلاب بشكل عام سواء مستجدين او سنوات تانية عن الجو بالجامعة كيف و شافوا تقريبا كل النماذج من الشباب و البنات المتواجدين معهم بالدفعة …طبعا الخطوجية كانوا ضمن الطلاب و كان منهم سنافر مستجدين و طلاب طالعين ع سنين تانية و حبوا يحكولونا من باب الضحك و تغيير الجو و الجدية نوعا منا عن نماذج شافوها من الشباب و البنات مثلت فئة كبيرة من الطلاب
هلأ منبدا بالشباب و نماذجهم الكتيرة المنشورة بهالعصر ، فالنموذج الأول هو الشب يلي اول مايفوت عالجامعة بيفكر حالو فايت وكل الاضواء ح تكون عليه لوحدو وهو المخلوق الفضائي و البوكيمون الساحر يلي رح ياخد الجو و حكمتو بالحياة “كل البنات بتحبك”وخدو بقا ع توزين وطق صور اول يوم بالجامعة و بوزات و حركات متل جوجو الوحش ، طبعا شي عادي أنك تشوف هاد النموذج لابس ألوان لا علاقة الها بالموضة مو مشان شي بس حتى يلفت الظر بألوانو الخارقة
وفي نموذج منتشر بصورة رهيبة هو الشب يلي مفكر جمالو بشعراتو لما يطرشن كيلو جل ويطلع بس بالواقع بيطلعو شكل هندسي ليس له مثيل ويستحق المشاهدة ، او بكون عنده حس مسؤولية و ما بحب الجيل و الواكس بس هوسه و شاغل عقله السيشوار تبع أخته فما بيقدر يطلع من غير ما يعمل لفة عند جويل و يبقى طول الوقت عم يرفع شعراته و يزتهم لورا فهو ببساطة هون بيجي اسمه ( الشب الطنط)
والشب يلي اناقتو بنضارتو الملازمة للقميص او يلي ما بتطلع غير بالمدرج ، فهون بتلاقي شي حدا من رفقاته المأفلين بقله ع مسمع ستين بنت ( افتحلك علبة شمس حبيب؟؟)
اما الشب يلي مو بعينو اناقة ابوكشرة بيجي عايف حالو من الصبح بس بدو يلبس ويطلع عالجامعة ويخلص ف ممكن يلبس قميص بالمقلوب كل جرابة شكل عادي كل شي بصير ، و نام عالطريق لبين ما وصل عالجامعة لك و قرفان و مالل عمره متل الرجال يلي متجوز اربع نسوان و عنده من كل وحدة ولد معاق و تنين خرسان….المهم ما علينا الله يعين العالم
ولا بد من وجود النموذج الشب المهضوم او بالاحرى يلي مفكر حالو مهضوم وصاحب نكتة ونهفة الشلة وهو كل نكته من العصر الجاهلي او بيتصرف تصرفات بخلي المدرج كله يضحك عليه و بصير اسمه مسخرة الدفعة
وما مننسى نموذج الشب يلي مفكر حاله لسه طالب مدرسة جاية عالجامعة من اول يوم وشايل عشر كتب ولكل مادة دفتر واربع اقلام ملونة و سندويشة زيت و زعتر و خيارة بشنتايته
طبعا النماذج كتيييرة و لا تعد و لا تحصى و لو بدنا نذكرها كلها ممكن يتخرج السنفور و ما تخلص ، بس صار لازم نحول ع نماذج البناات و
حسب التوصيات اللي اجتني مارح تقل العيار عليهم مراعاة لمشاعرهم الملشخة
فأول ما تفتح الجامعات كل سنة أبوابها أول منظر ملفت بأي دفعة جديدة كمية الصبايا اللي بتجي مفكرة حالها رايحة عشي عرس و بتلاقي وشها مطروش ألوان لدرجة أنك بتفكرها لابسة قناع أو عاملة وش جبصين للديكور و كعب مقاس 24 كأنوا حدا مخبرها عنا مسابقة للأطول أو مسابقة للألوان الأكتر
وفي نموذج كمان للصبايا اللي بيجو لابسين ألوان مالها نهاية و كل وحدة لابسة خمسين اسوارة ملونة و بكل اصبع خاتم لون شكل و برقبتها حاطة٢ كيلو اكسسوارات لدرجة الواحد بيفكرهن جايين على معرض أو عرض أزياء
اما نموذج بنات مرض التوحد ، بتلاقيهون بالغالب بمجموعات صغيرة ما بتتعدى التلاتة و بتعرفون من المقلوبة يلي بوجههن واشمئزازهن من المكان عأساس كانو موعودين يدخلو كامبردج و نصدمو بالواقع ،المشكلة هي الفئة بتكون مستفزة لدرجة على اد مالهن نكرة ما بحبوا حدا يقرب منهم و لو شي بنت غلطت بحقهم و اجت تسلم مجرد سلام عليهم فهو بكون هاد السلام تبع رووس الأصابع و ابتسامة بتدوم لجزء من الثانية
و ما مننسى النموذج الأكثر لفتاً للنظر يلي هو شلة بكالوريا و فاتو نفس الكلية ، هلأ هدون مافي داعي تدور عليهم لأن صوت ضحكهن بتسمعو ع بعد ٤ مدرجات غالباً بتكون عندهم المياعة لا دين لها
و النموذج يلي عم ينتشر بسرعة عالية هو نموذج البنت يلي متعلمة الاتيكيت جديد من شي مسلسل تركي او مسلسل كوري و جايية تطبقه بالجامعة ، هي البنت بكون عندها مجموعة من الأحرف ناقصين مثل حرف الطاء و الصاد مثلا ، كمان بتدحش بين كل كلمة و التانية كلمة انكليزي طبعا لفظها غلط و كلمة فرنسي مالها موجودة اساساً ،هلأ المضحك عنجد أن هي البنت نفسها ها بكون اسمها بالبيت أبو عنتر و كانت تلعب مع ولاد الحارة بالدحل و تتسابق معهن عالبسكليت
وفي عنا كمان البنت الطيوبة زيادة يلي بتوصل قبل المحاضرة بساعة و بتحجز بالصف الأول و تركيزها بالقمة و عال العال ، ما بتخلي كلمة ما بقولها الدكتورما بتكتبها حتى لما يعطس بتسجل هالشي و آخر أربع دقايق بالمحاضرة بتكتشف أن هي المحاضرة مو الها و مخربطة بالمدرج ….
نماذج كتيرة و مواقف مضحكة بتصير مع كل واحد فينا و كل سنفور طبيعي يعمل اله بريستيج خاص و يحب يلفت النظر بتصرفاته سواء كانت صح ولا غلط ، ممكن يكون هالمقال تقيل العيار ع شوية ناس و رح يعصب منه شوية ناس تانية بس المقصود هون أنو نخف شوي ولا نخلي فرحة دخول الجامعة تحطنا بمواقف رح تنمسك ذلة علينا طول عمرنا و نفوت الجامعة طبيعيين ولا نصطنع شي بأشكالنا و أفعالنا ، ومشان اللي رح يقلي أنت عأساس ما كنت مستجد قبل هيك بقلو مبلى و متل مو ماسك ذلل لرفقاتي هني ماسكيين عليي ولهيك عم ننصحكم و تقلكم خليكم عادي و عالطبيعة والأشكال يلي عم نشوفوها بالتلفزيون هي أشكال بتبقى بالتلفزيون ومالها واقعية و مافي داعي تمثلوها بحياتكم لأن مالح تكون ناجحة ، عيش حياتك ببساطة و انبسط و اضحاك و غير جو بس ضمن حدود العقل ، الجامعة مرحلة بتاخد فيها حرية كبيرة كتير بعد ضغط كبير كتير فهاد مو معناه أنك تعوض سنين المدرسة بالشغلات الغلط و يلي ما منها فائدة ، بالعكس استغل هاد الشي بمشاريع أو آفكار ممكن تكون بسيطة بس بتستفيد منها و بتفيد ……… خلونا نقول عنها نصيحة للسنافر و خطوة للتغيير .
#خطوجية_فهمانة
#خطوجية_مبتكرة