من لما كنا صغار علمتنا سوريا كيف ما ننكر المعروف و كيف نرد الجميل….علمتنا كيف نتعامل مع أهل الطيبة و الشهامة و الضيافة….
ومع كل شربة مي شربناها منها انغرس فينا عادات و تقاليد سورية بتحكي لنا أن من واجبنا كشباب سوري نشكر يلي ساعدنا و استقبلنا و قدملنا كلشي …
مصر أم الدنيا كانت وجهة أغلب السوريين يلي خلتهم الظروف يتركوا بلدهم ويطلعوا منها مكسورين بدهم مين يوقف معهم و يساعدهم ، مصر هي البلد يلي فتحتلنا ابوابها مع ابتسامة شعب دافية و كرم فياض و واستقبال أخوي بيتتوج بكلمة شهيرة بتتردد على مسامعنا ( انتو نورتوا بلدكم)
فكان واجب علينا كشباب سوري ممثل بمؤسسة (خطوة تجمع الطلبة السوريين في مصر ) يرد ولو شي بسيط من هاد المعروف عن طريق مبادرة ( شكرا مصر ) ، مبادرة انطلقت من حوالي سنة بشكر لجامعة عين شمس ، وفيكم تشوفوا التفاصيل من الرابط التالي :
http://goo.gl/V2ty2a
وتابعنا المبادرة هي السنة بشكر لجامعة عروس النيل متل ما بيسميها أهلها (جامعة المنصورة) والي كان تاج هي العروس طيبة اهلها وحسن ضيافتهم متل عادة كل مصري
وتم هاد الحفل برعاية وتشريف حضور الاستاذ الدكتور رئيس الجامعة ورئاسة ومسؤولين ادارة الوافدين الي اكتمل نجاح الحفل بوجودهم
افتتحنا الحفل بكلمة شكر من خطوة وباسم كل الطلبة السوريين للشعب المصري ومناقشة اهم المواضيع والقضايا الي بتهم الطالب السوري ولكن ما كنا اكرم من الاستاذ الدكتور محمد القيناوي الي اتوجه بكلمتو بالشكر ألنا على الي عاملينو والي عزز كلامو بالمقولة الشهيرة ( من لا يشكر الناس لا يشكر الله ) وبعد هيك استمرت المبادرة بعرض بيعبر عن الفولكلور السوري و العادات و التقاليد السورية عن طريق الرقصة الشعبية (الدبكة) بالاضافة لفقرة غناء جماعي وفقرة شعر و حضر المؤتمر الهيكل الإداري للجامعة و ممثلين شؤون الطلبة و كمان عدد كبير من الوافدين من الخليج و نيجيريا و العراق و أثيوبيا و اليمن و تغطت الفعالية كاملة عن طريق الصحف الرسمية والالكترونية وعدة قنوات تلفزيونية اهمها القناة المصرية الأولى
وهي لينك تقرير القناة المصرية عن الحملة http://goo.gl/Y3JOqC
منتمنى تكون خطوة قدرت تعبر عن مدى امتنان الشعب السوري من كرم الشعب المصري و تكون قدمت كلمة شكر توازي كلشي تقدملنا ويستمر كل سوري بشكر الناس الي وقفوا وعو بأي بلد عايش فيه ليعكس الصورة الصح للسوري الأصيل…..
